ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 12 ਨਵੰਬਰ ਨੂੰ ਏਕੀਕ੍ਰਤ ਲੋਕਪਾਲ ਯੋਜਨਾ ਨੂੰ ਲਾਂਚ ਕਰਨਗੇ, ਜਿਥੇ ਇਕ ਥਾਂ ਹੀ ਸਾਰੇ ਬੈਂਕਾਂ ਦੀਆਂ ਸ਼ਿਕਾਇਤਾਂ ਦਾ ਨਿਪਟਾਰਾ ਹੋ ਸਕੇਗਾ। ਵੱਖ ਵੱਖ ਬੈਂਕਾਂ ਨਾਲ ਜੁਡ਼ੀਆਂ ਸ਼ਿਕਾਇਤਾਂ ਸਬੰਧਤ ਬੈਂਕਾਂ ਨੂੰ ਈਮੇਲ ਜਾਂ ਪੋਰਟਲ ’ਤੇ ਦਰਜ ਕਰਾਉਣ ਦੀ ਲੋਡ਼ ਨਹੀਂ ਹੋਵੇਗੀ। ਕਸਟਮਰ ਸਾਰੀਆਂ ਸ਼ਿਕਾਇਤਾਂ ਇਕ ਹੀ ਥਾਂ ਕਰ ਸਕਣਗੇ।
‘ਵਨ ਨੇਸ਼ਨ-ਵਨ ਓਮਬਡਸਮੈਨ’ ‘ਤੇ ਆਧਾਰਿਤ ਇਸ ਯੋਜਨਾ ‘ਚ ਰਿਜ਼ਰਵ ਬੈਂਕ ਦੁਆਰਾ ਨਿਯੰਤ੍ਰਿਤ ਸਾਰੀਆਂ ਵਿੱਤੀ ਸੰਸਥਾਵਾਂ ਇਸ ਲੋਕਪਾਲ ਦੇ ਦਾਇਰੇ ‘ਚ ਆਉਣਗੀਆਂ। ਸ਼ਿਕਾਇਤ ਦਰਜ ਕਰਵਾਉਣ ਲਈ ਇੱਕ ਪੋਰਟਲ, ਇੱਕ ਮੇਲ ਆਈਡੀ ਅਤੇ ਇੱਕ ਟੋਲ ਫਰੀ ਨੰਬਰ ਹੋਵੇਗਾ। ਯਾਨੀ, ਗਾਹਕਾਂ ਲਈ ਆਪਣੀਆਂ ਸ਼ਿਕਾਇਤਾਂ ਦਰਜ ਕਰਨ, ਸੰਬੰਧਿਤ ਦਸਤਾਵੇਜ਼ ਜਮ੍ਹਾਂ ਕਰਾਉਣ ਅਤੇ ਸ਼ਿਕਾਇਤ ਦੀ ਸਥਿਤੀ ਨੂੰ ਟਰੈਕ ਕਰਨ ਲਈ ਇੱਕ ਸਿੰਗਲ ਰੈਫਰੈਂਸ ਪੁਆਇੰਟ ਹੋਵੇਗਾ। ਸਰਕਾਰ ਦਾ ਉਦੇਸ਼ ਸ਼ਿਕਾਇਤ ਨਿਵਾਰਨ ਪ੍ਰਣਾਲੀ ਨੂੰ ਮਜ਼ਬੂਤ ਅਤੇ ਸੁਧਾਰ ਕਰਨਾ ਹੈ ਤਾਂ ਜੋ ਆਮ ਲੋਕਾਂ ਨੂੰ ਰਾਹਤ ਮਿਲ ਸਕੇ।
ਬੀਮਾ ਲੋਕਪਾਲ ਦਿਵਸ
ਵੀਰਵਾਰ, 11 ਨਵੰਬਰ ਨੂੰ ਪੂਰੇ ਦੇਸ਼ ਵਿੱਚ ਇੰਸ਼ੋਰੈਂਸ ਓਮਬਡਸਮੈਨ ਦਿਵਸ ਬੜੇ ਉਤਸ਼ਾਹ ਨਾਲ ਮਨਾਇਆ ਜਾ ਰਿਹਾ ਹੈ। ਇਸ ਸਾਲ ਮਾਰਚ ਵਿੱਚ, ਕੇਂਦਰ ਸਰਕਾਰ ਨੇ ਬੀਮੇ ਨਾਲ ਸਬੰਧਤ ਹਰ ਤਰ੍ਹਾਂ ਦੀਆਂ ਸ਼ਿਕਾਇਤਾਂ ਨਾਲ ਨਜਿੱਠਣ ਲਈ ਬੀਮਾ ਲੋਕਪਾਲ ਐਕਟ ਵਿੱਚ ਵੱਡੇ ਬਦਲਾਅ ਕੀਤੇ, ਅਤੇ ਦੇਸ਼ ਭਰ ਵਿੱਚ ਮੌਜੂਦ 17 ਬੀਮਾ ਲੋਕਪਾਲ ਦੇ ਦਫ਼ਤਰਾਂ ਦੀ ਸਹਾਇਤਾ ਲਈ ਬੀਮਾ ਲੋਕਪਾਲ ਲਈ ਕੌਂਸਲ ਦੀ ਸਥਾਪਨਾ ਵੀ ਕੀਤੀ ਹੈ।
ਬੀਮਾ ਓਮਬਡਸਮੈਨ ਸਾਰੀਆਂ ਬੀਮਾ ਕੰਪਨੀਆਂ ਨਾਲ ਸਬੰਧਤ ਸ਼ਿਕਾਇਤਾਂ ਦਰਜ ਕਰਨ ਲਈ ਕੋਈ ਫੀਸ ਨਹੀਂ ਲੈਂਦਾ। ਵਿੱਤੀ ਸਾਲ 2021 ਵਿੱਚ, ਦੇਸ਼ ਭਰ ਵਿੱਚ ਮੌਜੂਦ 17 ਲੋਕਪਾਲ ਦੁਆਰਾ ਬੀਮਾ ਕੰਪਨੀਆਂ ਦੇ ਦਾਅਵਿਆਂ ਅਤੇ ਨੀਤੀਆਂ ਨਾਲ ਸਬੰਧਤ 35019 ਸ਼ਿਕਾਇਤਾਂ ਪ੍ਰਾਪਤ ਹੋਈਆਂ, ਜਿਸ ਵਿੱਚ 87 ਪ੍ਰਤੀਸ਼ਤ ਤੋਂ ਵੱਧ ਯਾਨੀ 30,596 ਸ਼ਿਕਾਇਤਾਂ ਦਾ ਲੋਕਪਾਲ ਦੁਆਰਾ ਨਿਪਟਾਰਾ ਕੀਤਾ ਗਿਆ।
ਕੋਵਿਡ-19 ਤੋਂ ਬਾਅਦ ਆਨਲਾਈਨ ਸ਼ਿਕਾਇਤ ਦੀ ਸਹੂਲਤ
ਕੋਵਿਡ-19 ਤੋਂ ਬਾਅਦ ਆਨਲਾਈਨ ਸ਼ਿਕਾਇਤ ਰਜਿਸਟ੍ਰੇਸ਼ਨ ਦੀ ਸਹੂਲਤ ਵੀ ਸ਼ੁਰੂ ਹੋ ਗਈ ਹੈ। ਪਾਲਿਸੀ ਧਾਰਕਾਂ ਦੀਆਂ ਸ਼ਿਕਾਇਤਾਂ ਦੇ ਨਿਪਟਾਰੇ ਲਈ ਦੇਸ਼ ਭਰ ਵਿੱਚ 17 ਬੀਮਾ ਲੋਕਪਾਲ ਦੇ ਦਫ਼ਤਰ ਹਨ। ਦੇਸ਼ ਵਿੱਚ 58 ਬੀਮਾ ਕੰਪਨੀਆਂ (ਜੀਵਨ ਬੀਮਾ, ਆਮ ਬੀਮਾ ਅਤੇ ਸਿਹਤ ਬੀਮਾ) ਹਨ। ਸਾਰੀਆਂ ਕੰਪਨੀਆਂ ਦੀ ਆਪਣੀ ਸ਼ਿਕਾਇਤ ਨਿਵਾਰਣ ਪ੍ਰਣਾਲੀ ਹੈ। ਗਾਹਕ ਨੂੰ ਪਹਿਲਾਂ ਬੀਮਾ ਕੰਪਨੀ ਨੂੰ ਸ਼ਿਕਾਇਤ ਕਰਨੀ ਪੈਂਦੀ ਹੈ। ਜੇਕਰ ਤੁਸੀਂ ਕੰਪਨੀ ਤੋਂ ਸੰਤੁਸ਼ਟ ਨਹੀਂ ਹੋ, ਤਾਂ ਬੀਮਾ ਓਮਬਡਸਮੈਨ ਨੂੰ ਸ਼ਿਕਾਇਤ ਕਰੋ, ਤੁਸੀਂ ਬਿਨਾਂ ਕਿਸੇ ਖਰਚੇ ਦੇ ਲੋਕਪਾਲ ਨੂੰ ਸ਼ਿਕਾਇਤ ਕਰ ਸਕਦੇ ਹੋ।
